|
SKOLE EN KINDERS
Kinders gaan in NZ vir 13 jaar skool en begin op die ouderdom van vyf.
Skoolbywoning is verpligtend tot 16 jr. Van jaar een tot jaar ses (Standerd 3 in
die ou SA stelsel) is kinders in die "Primary School". Vir jaar sewe en jaar agt
(Std. 4 & 5) is hulle in die "Intermediate School" en van jaar nege tot dertien
(Std.6 tot 10) is hulle in die "High School". Skool standaarde is hoog en die
opvoeding baie goed. Die skoolfonds of "donation" vir my kinders beloop NZ $150
per kind en hulle "activities & book fees" 'n verdere NZ $110 per kind.
Gemiddeld kan jy dan so reken op NZ $260 per kind per jaar. My seuntjie het in
die laerskool met gewone klere skooltoe gegaan, maar in die "Intermediate
School" moes hy skooluniform begin dra. Die koste van 'n volledige nuwe
skooluniform vir my dogter in Std.6 het ongeveer NZ $250 beloop. Van daar vul 'n
mens mos maar die stukke aan soos dit nodig raak.
Skool begin gewoonlik so ongeveer 08:30 in die oggend en kom om ongeveer 15:20
in die middag uit. Die kinders pak gewoonlik kos in dat dit lyk of hulle vir 'n
paar dae gaan wegbly, maar dit is net vir een dag. Hulle moet 'n eetding hê vir
"morning tea" wat so by 10:40 is en vir "lunch" wat so by 12:50 is. So eintlik
eet hulle meer as wat hulle leer! Hulle kry redelik huiswerk, maar sal hulle ook
nie dood werk daaraan nie. Laerskoolkinders kry so 20 tot 30 minute se huiswerk
vier dae van die week, "Intermediate" skool so tussen 30 en 40 minute se
huiswerk vier dae van die week en Höerskoolkinders enigiets van 1 tot 3 ure per
dag. Baie tyd en aandag word aan kinders met leerprobleme gegee en daar is baie
hulp beskikbaar. Selfs kinders met ernstige probleme word op maniere gehelp wat
altyd hulle menswaardigheid voorop stel. Ongelukkig is daar ook 'n groot klomp
kinders (of ouers) wat maar net langs die pad opgee. Die Kiwi's is BAIE goed met
kinders.
Die eerste kwartaal wat ons seun in die laerskool was het hy 'n bietjie probleme
gehad met die Rooi Taal se uitsprake en sinsnedes. Sy klasonderwyser het hom toe
op die redaksie van die skoolkoerant geplaas en onder hierdie dekmantel het die
man BAIE oefening gekry in uitspraak en die samestelling van sinne en ook op
hierdie manier baie ekstra klastyd in engels. Heelwat van sy werk het darem ook
die koerant gehaal (ek sal nou nie aanbeveel dat hy joernalistiek as beroep
oorweeg nie!) en hy het belangrik gevoel terwyl hy eintlik oortyd aan sy Engels
gewerk het. Twee kwartale later kon jy nie die verskil tussen hom en 'n volbloed
Kiwi-tjokker sê nie. Afrikaner kinders doen BAIE goed in die skole in NZ en dit
behoort niemand af te skrik nie.
Skolesport soos ons dit in SA ken bestaan nie hier nie en die skool bied die
minimum sportontwikkeling aan. As kinders aan sport wil deelneem moet hulle by
klubs, ens. aansluit. Met die gebrek aan sportontwikkeling by skole staan
ek eintlik verwonderd dat hulle so goed doen in die sportwêreld.
Verskillende Skole:
Laerskool (Primary
School) - Jaar 1 tot 6 van die kind se
skoolloopbaan.
"Intermediate School"
- Jaar 7 en 8 van 'n kind se skoolloopbaan.
Höerskool (High
School) - Jaar 9 tot 13 van 'n kind skoolloopbaan.
In sommige plekke kry
jy ook 'n skool van hulle "Middle School" noem en
daar kan 'n kind skool gaan van Jare 7, 8, 9 &10.
In jaar 7 van 'n kind
se skoolloopbaan begin die standerds ook as "Forms"
begend staan en in jaar 7 is hy/sy in "Form 1" en
gaan die "Form" nommers elke jaar op totdat die kind
aan die einde van sy skoolloopbaan in "Year 13" dan
ook in "Form 7" is.
Universiteite en Voortgesette onderrig: As jy in NZ nie verder studeer nie
is dit beslis net jou eie skuld, want studielenings/ beurse/ subsidies is vryelik
beskikbaar, selfs vir volwasse (en ou) studente. Die regering subsidieer
voortgesette onderwys met baie groot bedrae en verskeie kursusse by
Universiteite/Polytechs (Technicons) is belaglik bekostigbaar. Ek het self
verskeie kursusse by die Waikato Institute of Technology gedoen wat my
normaalweg 'n paar duisend dollar sou gekos het vir slegs 'n paar honderd
dollar. NZ is voorvaar 'n studente paradys met werêldklas opleiding en dis geen
wonder dat oorsese studente hierheen stroom nie.
New Zealand is seker nog van die min lande in die wêreld waar jy kinders in
groot veiligheid kan grootmaak en waar hulle 'n toekoms gaan hê. As daar een
enkele rede is wat 'n mens kan uitsonder om na NZ te immigreer is dit vir wat NZ
jou kinders bied. Dit is 'n fantastiese land om kinders in groot te maak en oor
hierdie faset kan 'n mens ook ure lank uitbrei, maar ek gaan daarmee volstaan.
|
