Afrikaner in New Zealand - Hoe is New Zealand?



	OP HIERDIE BLAD MUURPROPPE CADAC GASBOTTELS UIT SA WERK NIE HIER NIE VERSEKERING BEHEER BY LUGHAWENS GIFTIGE GOED WAT BYT BIER EN WYN IN NZ KIWI WOORDE, UITDRUKKINGS en UITSPRAKE WAARAAN ONS NIE GEWOOND WAS NIE TV-KANALE DIE VERSKILLE TUSSEN NZ EN SA IN IMMIGRANTE SE EIE VERHALE



VERSKILLE TUSSEN NZ EN SUID-AFRIKA IN "N NEUTEDOP As die verskille tussen SA en NZ in 'n paar sinne opgesom wil hę lees HIER asseblief.



MUURPROPPE SA elektriese muurproppe pas nie hier in NZ nie. Om presies te weet watter proppe om te koop het ek 'n blad gemaak met 'n paar foto's en afmetings, sodat jy presies kan weet watter prop of verbindingstuk (adapter) om te koop. KLIEK HIER om na die blad met die foto's van die muurproppe te gaan. Die blad maak in 'n nuwe venster oop.



CADAC GASBOTTELS UIT SA Ons sit almal nog met ons ou CADAC gasbottels uit SA, want jy kan hom nie hier laat volmaak nie. Eerstens verskil die koppeling en tweedens mag gashervulplekke (gewoonlik sommer die petrolstasie) slegs bottels hervul wat in NZ gedruktoets is. Elke gasbottel kry ook 'n plakker op waar elke hervulling aangeteken word en die bottels se reeksnommer word geregistreer. Gasbottels mag net vir 'n sekere aantal hervullings gebruik word voordat dit as onveilig beskou word. Los maar die CADAC gasbottel in SA en kom koop hier 'n nuwe een. Probleem opgelos!! 'n Splinternuwe 9Kg gasbottel kos in NZ ongeveer $50. LW: BRING jou gasbraai en jou Skottelskaar en al daai lekker gastoerusting wat 'n mens in SA kry en kom kry net hier vir jou 'n nuwe bottel. Moenie jou gastoerusting in SA los nie.



KINDERS Kinders gaan 13 jaar lank skool en begin in die jaar waarin hulle 5 jaar oud word. Kinders onder 14 jaar oud mag NIE alleen by die huis gelaat word nie. Dogters kan op enige ouderdom 'n aborsie kry SONDER die ouers se toestemming! Kinders kan op 15 jaar 'n leerlingbestuurderslisensie kry. Kinders is verplig om tot 16 jaar skool te gaan. Kinders kan vanaf 14 jaar wettig drank gebruik as hulle ouers die drank aan hulle verskaf. Kinders kan eers op 18 jaar self drank en sigarette koop. Kinders raak op 18 jaar stemgeregtig. Kinders onder 14 jaar mag nie vuurwerke koop nie. Kinders word op 20 volwassenes. Kinders kan op enige ouderdom 'n Lotto-kaartjie koop, maar moet oor 16 jaar wees om 'n krapkaartjie te koop! Kinders mag NIE GESLAAN WORD NIE! 'n Goeie pakslae (soos dié waarop ons grootgeword het) kan jou in groot moeilikheid laat beland (hoewel ek nog steeds oortuig is daar is niks so goed vir 'n kind as 'n plat hand op die gat nie!). Jan kan net op skool bly tot jy 19 jr oud is.



VERSEKERING In vergelyking met SA is versekering werklik goedkoop. 'n Voertuig met 'n waarde van minder as NZ $25 000 en huisinhoud van NZ $40 000 kan as 'n pakket verseker word vir NZ $60 per maand. Lewensversekering van NZ $300 000 sal jou ongeveer NZ $50 per maand kos as jy tussen 40 en 43 jr oud is. 'n Man wat jou vinnig op hoogte kan bring met al jou versekeringsopsies in NZ is Fritz Swart (ja, hy praat Afrikaans). Besoek gerus sy webwerf ( www.fritzswart.co.nz ) vir meer inligting.



TREK JOU SKOENE UIT! SAners wie die eerste keer in NZ kom vind dit snaaks, irriterend en soms vernederend dat hulle, hulle skoene moet uittrek voordat hulle 'n huis binnegaan. By sommige SAners se huise dring hulle selfs daarop aan dat jy jou skoene aanhou uit vrees dat hulle aanstoot sal gee. Ek het 'n storietjie geskryf oor sulke SAners. Lees die storie HIER. Die gebruik om jou skoene uit trek voordat jy 'n huis binnegaan is so prakties en "common sense" dat ons aldag vergeet om dit aan ander SAners te verduidelik. Eerstens kan dit soms vir lang tye aaneen reën en as almal met hulle nat modder skoene op jou matte loop raak dit later sopnat en word nie gou weer droog nie en kan die matte begin vrot. Ons is almal bekend met die benoude reuk van 'n ou huis met nat matte!!. Tweedens is daar nie bediendes wat jou matte elke dag kan skoonmaak nie, jy moet dit self doen! By baie huise sal jy 'n notabordjie by die voordeur sien wat jou versoek om jou skoene uit te trek, so trek maar jou skoene uit voordat jy 'n huis in NZ binnegaan - die groot klomp skoene wat voor die deur staan beteken nie ons is almal Mohammdane nie, ons trek net almal ons skoen uit.



BEHEER BY LUGHAWENS As gevolg van die feit dat die ekonomie van NZ op landbou aangewese is, is biologiese beheermaatreëls UITERS streng. Moet onder GEEN omstandighede enige plantaardige of dierlike produkte die land probeer binnebring nie (veral nie biltong nie!). Selfs modder onder jou skoene of 'n half-gëete toebroodjie kan jou in ernstige moeilikheid bring. Verklaar enige produk of plant of ENIGIETS waaroor jy twyfel, as jy dit verklaar kan hulle dit net afneem en vernietig en spring jy die boete of selfs arrestasie vry. As hulle jou vang (en hulle gáán, want die honde snuffel aan almal en al die bagasie wat inkom) sal jy gearresteer word en as jy baie gelukkig is sal jy 'n NZ $200 (ongeveer R850) boete op die plek kry. Die doane amptenare van NZ word beskryf as "The customs officials from hell" en sal enige verskoning soek om jou te beboet (ons praat van persoonlike ervaring! Lees ook die artikel in "Koerantberigte"). Dit is NIE die moeite werd NIE en ons ondersteun die Kiwi's in hierdie verband, want dit kan hulle ekonomie vernietig. Ons maak baie lekker biltong in Kiwiland en NZ $200 kan baie biltong koop, sonder tronkstraf!! Niemand word gespaar nie, nie eens posterre nie. Die popgroep Franz Ferdinand was met $200 beboet vir 'n enkele lemoen in hulle bagasie.



GIFTIGE GOED WAT BYT Miskien moet ek net iets sę van giftige goed in NZ. New Zealand het geen slange of skerpioene nie en net een inheemse giftige spinnekop (Katipo) wat baie skaars is en in baie jare nog niemand se dood veroorsaak het nie. Teengif teen hierdie spinnekop se byt is egter geredelik beskikbaar by hospitale . Die enigste ander giftige spinnekop is 'n indringer van Australië genaamd die "White-tailed Spider" (op foto links) en hierdie pes is redelik algemeen. Die spinnekop se byt is nie dodelik nie, maar pynlik en gaan gepaard met 'n swelsel en erge irritasie. Ontsteking van die byte veroorsaak die grootste probleme. Ek was so gelukkig om gedurende Desember 2004 sewe byte van die bliksem op my voorkop te kry in een aand. Aanvanklik was dit nie pynlik nie en het dit net soos ontsteekte muskietbyte gelyk, maar binne 'n paar uur was die byte erg geswel en baie pynlik met blasies op die bytplekke. Ek was verplig om my dokter te besoek nadat die bytplekke ontsteek het en antibiotika en kortisoonsalf het redelik gou verligting gebring. Die bytplekke het ongeveer vir twee weke geswel gebly en dit het VERSKRIKLIK gejeuk. Na 'n week het daar rofies gekom in die plek van die blasies en het daar gaatjies in my vel ingeval waar die spinnekop my gebyt het (sien foto). Dit het die bytplekke ongeveer 'n maand geneem om te genees. Ek was seker maar net een van die ongelukkiges, want eintlik is ons nie baie bekommerd oor gifgoed nie.



BIER EN WYN IN NZ Die keuse van biere in NZ is net ongelooflik en bo en behalwe die gewone Europese, Meksikaanse, Australiese en Amerikaanse biere wat jy hier kan kry is daar dosyne plaaslike biere wat baie goed smaak. Daar is selfs 'n brouery (Monteiths) wat seisoens biere uitbring met vrugte geure, ens. Steinlager is seker die bekendste van NZ se biere en hoewel hy lekker is (smaak amper soos Holstein) is hy "overrated" en "overpriced". Ek hou van 'n duitse bier wat plaaslik gebrou word nl. Rheinneck. Dit is ook een van die goedkoper biere en jy kry dit gewoonlik vir so $10 vir 12 Biere. Dit het 'n fantastiese skoon smaak en is lig genoeg vir dames ook. SAners sal jy oor die algemeen nie vang dat hulle (openlik) Rheineck drink nie, want omtrent ALLES wat SAners hier doen doen hulle vir die "effek" om 'n moerse indruk op ander te maak en hulle sal deur die bank die duurder biere by braaivleise en danse drink soos Export Gold, Steinlager, Sol, Amstel, Stella Artois of Heineken. By die huis sal hulle hondepis ook drink as dit goedkoop is, maar buitekant is dit net die "meneer" biere wat hulle drink om hulle pęlle te beďndruk. Daar is ook baie "ciders" beskikbaar en my gunsteling is Mac's Cider. Dis 'n ligte rooi cider met spesery geure en so effens soeterig. Ongelukkig kan jy dit net by "pubs" kry in "draught" en nie in bottels nie. Biere is oor die algemeen ook ligter in alkohol en 'n tipiese NZ bier het so 3.5% tot maks.4% alkohol en sal in SA as 'n "light" bier deurgaan. Nee-wat hier is genoeg biere om van te kies en as jy nie reg kom nie is Castle Lager darem redelik maklik in meeste supermarkte verkrygbaar. In Auckland by die meeste SA winkels kan jy al die SA biere kry, maar dis nie einlik prakties om dit te doen nie en ek sal sę kies 'n plaaslike bier waarvan jy hou en koop hom. Oor die NZ wyne wil ek my nie eintlik uitlaat nie, want dit gee my "commen" SA smaak redelik aanstoot terwyl die mense omtrent in vervoering gaan oor die suur wyne van NZ. Jy kry baie, baie lekker NZ wyne, maar die goeies word meestal uitgevoer en is te duur om daagliks te gebruik. Australiese wyne is oor die algemeen baie lekkerder om te drink en beter waarde vir geld. Daarby kos Nederburg wyne hier goedkoper as 'n duur NZ wyn en smaak tonne beter. Oor die algemeen veroorsaak die kouer klimaat van NZ dat hulle wyne 'n groter persentasie vlugtige sure het en vir mense van 'n warmer klimaat smaak hulle wyne redelik suur en is dit 'n smaak wat jy moet aanleer. So op die ou end kom dit maar net neer op jou smaak en waarvan jy hou en is die smaak van NZ wyne seker maar net 'n kwessie van opinie. Vir die manne wat iets sterker vat as bier en wyn - KWV 5 jaar brandewyn is by baie bottelstore beskibaar vir ongeveer $45/bottel.



KIWI WOORDE, UITDRUKKINGS en UITSPRAKE WAARAAN ONS NIE GEWOOND WAS NIE Die Kiwi's gebruik soms 'n soort Ingels waaraan 'n mens (ek) gewoond moes raak of leer ken en die onderstaande is 'n paar van hulle: ANKLE BITER = 'n Kleuter BACH (uitgespreek "Batch") = Strandhuis (Kom van "Bachelor pad" af). BARBIE = braai BARRACOUTA = Soort van 'n baie lekker melkbrood - sag en hoog gerys. BEEHIVE = Die Parlementsgebou in Wellington BOMBPROOF = Veral op platteland gebruik om 'n perd te beskryf wat nie gou skrik nie en baie mak is. BRASSED OFF = Die moer in BRO = Broer of maat. BROLLIE = Sambreel BUSH = Word voor woorde gebruik om iets / iemand te beskryf wat grof/onprofessioneel of onopgelei is soos "Bush Lawayer" of "Bush Mechanic". CHEERS = Dankie CHILLY BIN = Cooler box CHIPPIE = Skrynwerker CHOICE = Die beste of baie goed CRASH = Oorslaap - gewoonlik ongenooid! (Kan ook 'n motorongeluk wees!). CRIB = Strandhuis (meer gebruik in Suid-Eiland) CROOK = Siek of voel nie lekker nie CUPPA = Koppie koffie of tee DAIRY = Klein kafeetjie op die hoek DECK = 'n Stoep DUNNY = Toilet FEED (Have a feed) = Om te gaan eet. FIZZY DRINK = Koeldrank FLASH = Lyk baie goed G'DAY = Hello GęRRIETS = Uitspraak van "Garage" GOOD AS GOLD = Alles is reg / Baie reg GOOD ON YA MATE = Wel gedaan! HE's A BIT OF A BLOUSE = Hy is ietwat van 'n sussie. HUNKY DORY = Alles is reg JAFA = Woord wat in die platteland gebruik word om iemand wat in Auckland bly te beskryf (Staan vir Just Another F......n/Fabulous? Aucklander!). JANDALS / THONGS = Plakkies JANDALS = Plakkies JAPIE = 'n SAner (Van "Plaasjapie" af) KNACKERED = Moeg LOLLY = Lekkergoed (Sweets) LOO = Toilet MATE = Vriend, maat MOBILE = Selfoon MORNING TEA = Brunch NO WORRIES = Geen probleem ôi! = Roep as hulle nie jou naam ken nie of as jy in die AAAAA is. PAKEHA = 'n Maori-woord vir 'n Wit persoon of iemand van Europese afkoms ROUNDABOUT = Verkeersirkel RUBBERNECK = Nuuskierige mense wie omkyk vir ongelukke terwyl hulle verby ry en baie keer self 'n ongeluk veroorsaak deur in die kar voor hom was te ry. SAMMIE = Toebroodjie SEE YA = Totsiens SHE'LL BE RIGHT of SWEET AS = Alles sal reg wees SHIFT YOUR ASS = Roer you gat! SKIVVY = 'n Polo-nek T-hemp. SLAPPER = 'n Goedkoop meisie met twyfelagtige sedes. SMOKO = 'n Rookbreuk. STUBBY = Klein bierbotteltjie STUFFED = Moeg of ooreet SUNNY's = Donkerbrille SUSS = Om iets uit te werk TA = Dankie TAKE A HIKE = Gaan weg / loop TEA = Aandete TEXT = SMS TIKI TOUR = 'n Goedkoop toer of 'n manier om tydmors te beskryf. TO SHOUT = Om vir almal drank of kos te koop. TOGGS = Swemklere TOGS = Swemklere UTE = 'n Bakkie WELLIES = Gumboots WESTIE = Iemand wat uit Wes-Auckland kom. Gewoonlik so 'n "Boy Van Die Suburbs" soort van ou. WOP-WOPS = In die bosse of in die gramadoelas YONKS = Forever YOUS FELLAS = Julle Sal die lys aanvul soos die woorde my byval, my kop is soos 'n sif - bo in onder uit en net hier en daar sit 'n druppel!



TV-KANALE New Zealand het 6 publieke TV-kanale, m.a.w kanale wat jy met jou gewone TV kan kyk sonder om te betaal. Daar is niks besonders aan die TV-kanale nie en die kwaliteit van programme is nou nie iets waaroor enigeen opgewonde sal raak nie. Programme word ook tot vervelens toe herhaal en ek wonder of daar nog 'n land in die węreld is waar TV-programme so oor-en oor gewys word? Getrou aan die Kiwi's se natuur sal ook omtrent ENIGIETS (ek is ernstig) die nuus haal en van die onbenulligste dingetjies kan 'n nuusberig van etlike minute raak (en besprekingsprogramme van etlike ure). 'n Mens moet dit self sien om dit te waardeer, dis ongelooflik. As jy enigiets ordentlik wil sien moet jy maar vir jou 'n skottel met betaal-TV (DSTV) kry en dit word in NZ verskaf deur SKY TV teen baie billike tariewe wat begin by ongeveer $50.00 per maand. Jy kan ook die gewone gratis kanale (hulle beweer daar is 9!) in digitale beeld kry met 'n FREEVIEW dekodeerder wat ongeveer $200 kos. Persoonlik dink ek Freeview is 'n mors van tyd. As jy beter TV wil hę kry maar vir jou SKY. As jy meer oor FREEVIEW wil weet besoek hulle webwerf HIER. Lees 'n meer volledige en eerlike siening van NZ se TV-kanale op die webwerf Stuff U can Use.



IMMIGRANTE SE EIE STORIES OOR HULLE ERVARINGS IN NZ EN DIE VERSKILLE Eerste aankoms in NZ Aanpassing in NZ en die verskille tussen SA en NZ



MAORI's KLIEK HIER om te kyk en te luister na 'n Maori-lied wat dit tot Nr.1 in NZ gemaak het. So lekker 1980's met "break dancing" en al. Baie oulik!!







^^ TERUG NA BO